»s'Ottebacher Däle«

Wo i nagang, do ond selt,
wo me omguck uf dr Welt
zom Bleibe däd i oinzeg wähle
s'scheane Ottebacher Däle!

Hend ihr Leit des scho mol g'sea,
send'r do au scho mol gwea?

Em Urlaub dent'r oft weit reise -
des müasset d'Hesse au, ond d'Preiße -
dia kennt gar et andersch wähle,
dia hand koi Ottebacher Däle!

Ihr suachet's Glick ond au de Friede
weit fort, em Norde oder Süde,
ond moinet, daß des Mittelmeer
viel scheaner als dr Schdaufe wär.

Schwärmet oft von der Türkei,
von Schbanien, wie schea des sei,
ond Frankreich sei so enteressant,
zur Bildung g'hair au Griechenland!

Äll deane Leit wett i verzähle,
s'scheanschd isch's Ottebacher Däle!

Irma Laubenstein