(entnommen aus dem Heimatbuch zum 700-jährigen Jubiläum)
Lobgedicht aus dem Jahre 1926 anläßlich der
Fertigstellung der Straße Ottenbach - Hohenstaufen:

Straßenbau Ottenbach - Hohenstaufen

Von Stauffa na nach Ottabach
Do goht's ara wia am Dach.
Ond ischt ma dronta, dann o waih,
no schpürt ma fascht koin Zaiha mai.

Von Ottabach nach Stauffa nuff,
Do goht ma beinah au fascht druff.
Dös ischt a bitterbais Geschtampf,
Maischt kriagt ma do da Wadakrampf.

Als Fahrweag geit's no d'Schonterstoig!
Ond ischt a Fuhrma' au net foig,
Doch hot er Angscht vor deam Geföll,
So wiea a Sender vor d'r Höll! -

Dös hot d'r Oberamtma' gseah,
Er ischt scho öfters draußa gwea,
Ond hot als Votum registriert:
Der Buckel wird balt korregiert.

Ond fertig brocht hot ears's, Reschpekt,
Was en da Köpf scho 60 Johr schteckt:
A Schträßle, weg von Ottabach,
Nach Stauffa nuff! Dös ischt a Sach.

Dia Gmoinda send glei' oinig gwea.
Ond wia! - so hot ma's selta gseah,
Ond d'Baura - die sonst henta fescht,
Verhaltet sich bös mos aufs bescht.

Do Oine treatet, s' ischt koin Papp,
Da Boda unentgeltlich ab,
De andere fahret voll von Schonscht,
D'Stoiwäge beinah omasonscht.

So wär also dia Sach perfekt.
D'Stroß wird morga scho ausgesteckt:
Es fehlt fascht nex mai, lieba Welt,
Als grad dös donderschlechtig Geld.

P.Nägele